7903231012_bda2a6d877_k-1-1600×900
Caption – Lorem ipsum dolor sit amet, consectetur adipiscing elit. Semper quam mi morbi pulvinar.

اگست ۲۰۱۹ میں جب جموں وکشمیر کو اپنی نیم خودمختار حیثیت سے محروم کیا گیا، نریندر مودی کی زیرقیادت بھارتیہ جنتا پارٹی (بی جے پی) حکومت نے اس قدم کو ایک “تاریخی غلطی کی اصلاح” قرار دیا تھا۔ بقول بی جے پی، جموں وکشمیر کی خصوصی حیثیت خطے میں امن کی راہ میں سب سے بڑی رکاوٹ تھی۔

۲۰۲۰ میں محفوظ ہونے کے بجائے، وسطی علاقوں میں سیاسی ہنگامہ آرائی اور سیکیورٹی کی بگڑتی ہوئی صورتحال سامنے آئی۔ اگرچہ کشمیر میں پرتشدد مظاہروں کے رواج میں کمی آئی، انٹرنیٹ اور دیگر پابندیوں کے باوجود بھی عسکریت پسندی میں کافی اضافہ دیکھنے میں آیا۔ اس سال لداخ میں چین کے ساتھ متنازعہ سرحد پر فوجی جھڑپیں ہوئیں، پاکستان کے ساتھ لائن آف کنٹرول (ایل او سی) سیز فائر کے خلاف ورزیوں کی متعدد وارداتیں ہوئیں، کشمیر میں سیاسی عدم استحکام بڑھ گیا، اور مہلک کووڈ ۱۹ وبا نے صورتحال کو مزید بدتر  کردیا۔ 

۲۰۲۰ کے حالات ۲۰۲۱ کی ایک خوفناک تصویر پیش کرتے ہیں جو معاشرتی سیاسی اور معاشی پریشانی کے ساتھ ساتھ سلامتی اور استحکام کے لئے بھی خطرہ ہوگا۔

کوویڈ ۱۹ اور کشمیر

کوویڈ ۱۹ کی وبا کے دوران ، حکومت نے لاک ڈاؤن کو نافذ کرنے کے لئے سخت اقدامات کا سہارا لیا۔ ۲۴ مارچ ۲۰۲۰ کی شب وزیر اعظم نریندر مودی نے لاک ڈاؤن کا اعلان کیا۔ لاک ڈاؤن نافذ کرنے کے لئے خلاف ورزی کرنے والوں کے خلاف پولیس مقدمات درج کیے گئے، انھیں سرعام سزا دی گئی اور یہاں تک کہ انہیں پولیس تحویل میں بھی لیا گیا۔ انتظامیہ نے طبی کارکنوں پر اپنی شکایات کا اظہار کرنے پر بھی پابندی نافذ کی۔

کوویڈ ۱۹ کی وبا اور انتظامیہ کی طرف سے عائد پابندیوں نے سنہ ۲۰۱۹ کے سیکیورٹی لاک ڈاؤن اور مواصلات کی بندش کے نتیجے میں پیدا ہونے والے معاشی بحران کو بڑھاوا دیا۔ ۲۰۲۰ کی آخری سہ ماہی میں اس وائرس کے پھیلاؤ میں کمی دیکھی گئی، جس نے اب تک اس خطے میں ۱،۹۰۰ سے زیادہ افراد کی جانیں لی ہیں۔ اگست ۲۰۱۹ کے بعد سیاحت پر منحصر معیشت کو اس کی بدترین کمی کا سامنا کرنا پڑا جب ہندو یاتری سالانہ عمرناتھ یاترا کو حکومت نے منسوخ کر دیا۔ مبصرین اب جموں و کشمیر کے ایک پہاڑی مقام گلمرگ میں موسم سرما کے کھیلوں کے پروگراموں کے انعقاد سے علاقائی سیاحت کے ساتھ کچھ معاشی بحالی کی توقع کرتے ہیں۔ اگرچہ تجارت اور سیاحت کو فروغ دینے کے لئے ایک معاشی پیکیج کا اعلان کیا گیا ہے، اقتصادی کامیابی کا انحصار کشمیریوں کے لئے ہندوستانی حکومت کے اعتماد سازی کے اقدامات کی کامیابی پر ہے۔

چین کے ساتھ سرحدی تنازعہ

جموں وکشمیر کی حیثیت میں تبدیلی کے بعد ، ۲۰۲۰ میں پہلے ہی کشیدہ ہند چین تعلقات میں مزید خرابی آئی۔ اس سال ہندوستان چین کا کم سے کم ۴۵ سالوں میں پہلا مہلک تصادم ہوا، جس کے نتیجے میں ہندوستان کی طرف ۲۰ افراد ہلاک اور چینی طرف نامعلوم تعداد ہلاک ہوئے۔ یہ تصادم جون ۲۰۲۰ کے وسط میں متنازعہ علاقے لداخ میں شروع ہوا۔

مبینہ طور پر چینی فوجی اس سے قبل ہندوستان کے زیر کنٹرول ۶۰۰ میل کے علاقے پر کنٹرول حاصل کر چکے ہیں۔ سرحدی علاقوں میں بھاری فوجی تعداد، جو بھارت چین ۱۹۶۲ کی جنگ کے دوران تعیناتی سے کہیں زیادہ بڑی ہے، نے آس پاس کی مقامی برادریوں میں خوف پیدا کردیا ہے۔ چین کی دخل اندازی کے بعد موسم سرما کی متعدد چراگاہیں اب مقامی لوگوں کے لئے ناقابل رسائی ہوگئی ہیں۔

لائن آف ایکچول کنٹرول کے قریب ہندوستانی فوج اور پیپلس لبریشن آرمی کے مابین تناؤ کا سلسلہ جاری ہے۔ جنوری ۲۰۲۱ میں میڈیا رپورٹس نے دعویٰ کیا کہ چین نے اروناچل پردیش، جو ایک ہندوستانی ریاست ہے جس پر چین جنوبی تبت کے حصے کے طور پر دعویٰ کرتا ہے، کے بالائی سبسانری ضلع میں دریائے تساری چو کے کنارے ایک نیا گاؤں تعمیر کیا ہے۔

ہندوستان نے دعویٰ کیا ہے کہ نئی دہلی اور بیجنگ دونوں سفارتی اور فوجی چینلز کے ذریعے سرحد پر مکمل امن کو یقینی بنانے کے لئے قریبی رابطے برقرار رکھ رہے ہیں۔ تاہم ، شمالی سکم بارڈر میں نکو لا میں نئی بارڈر جھڑپوں کی وجہ سے ۲۰۲۱ میں ہندوستان چین تعلقات میں کسی قسم کے ردوبدل کے امکانات کم ہیں۔

پاکستان کے ساتھ کراس بارڈر تنازعہ

۲۰۲۰ میں پاک بھارت سرحدی جھڑپیں عروج پر پہنچ گئیں، جس کے باعث سرحد کے قریب رہائش پذیر لاکھوں شہریوں کی جانیں  خطرہ میں پڑ گئیں۔ میڈیا رپورٹس کے مطابق، لائن آف کنٹرول پر ۴۰۰۰ سرحد پار فائرنگ کے واقعات، یعنی  روزانہ تقریباً ۱۰ سے ۱۲ واقعات، رپورٹ کیے گئے۔ ۲۰۰۳ میں پاک بھارت جنگ معاہدے کے بعد سیز فائر کی خلاف ورزیوں کی یہ سب سے بڑی تعداد تھی۔

جنوری ۲۰۲۰ میں جنگ بندی کی ایک خلاف ورزی کے دوران پونچھ سیکٹر میں ہندوستانی فوج کے ساتھ کام کرنے والے دو پورٹرز کی بھیانک ہلاکت واقع ہوئی۔ ہندوستانی فوج کو شبہ ہے کہ دونوں پورٹرز میں سے ایک کا سر قلم کرنے کے ذمہ دار پاکستان کی بارڈر ایکشن ٹیم ہے۔ مبینہ طور پر، ان ٹیموں میں پاکستان کے اسپیشل سروسز گروپ کے کمانڈوز اور پاکستان میں مقیم شدت پسند تنظیمیں جیسے جیش محمد اور لشکر طیبہ شامل ہیں۔

سرحد پار سے عسکریت پسندوں کی بڑھتی ہوئی دراندازی بھی دیکھنے میں آئی۔ ۲۰۲۰ میں عسکریت پسندی سے وابستہ تشدد میں اضافہ ہوا۔ جموں و کشمیر میں عسکریت پسندی سے وابستہ واقعات میں عسکریت پسندوں، شہریوں اور سیکیورٹی اہلکاروں سمیت ۳۲۰ افراد ہلاک ہوگئے۔ جبکہ جنوبی ایشیا کے دہشت گردی پورٹل کے مطابق ۲۰۱۹ میں عسکریت پسندی سے متعلقہ تشدد کی وجہ سے ۲۸۳ افراد ہلاک ہوگئے تھے۔

جموں و کشمیر میں نئے زمینی اور انتظامی قوانین کے خلاف احتجاج کرنے والے مشتعل مقامی نوجوانوں کا عسکریت پسند گروپوں میں شمولیت اختیار کرنے میں اضافہ ہوا ہے، جس سے اس خطے کی سیکیورٹی صورتحال پر شدید اثر پڑا ہے۔ ۲۰۲۰ میں کشمیر میں ۱۴۵ کے قریب مقامی نوجوان عسکریت پسندوں کی صفوں میں شامل ہوئے۔ جب کہ سیکیورٹی فورسز نے مقامی عسکریت پسندوں کے لئے نئی ہتھیار ڈالنے اور بحالی پالیسی کی تجویز پیش کی، انہیں غیر قانونی قتل کے الزامات کا سامنا کرنا پڑا۔ مثال کے طور پر، فوج کے جعلی مقابلوں کے نتیجے میں بے گناہ شہریوں کی اموات واقع ہوئیں، جس سے سیکیورٹی کی صورتحال مزید خراب ہوگئی ہے۔

انتخابی مقابلہ

سیاسی محاذ پر، ڈسٹرکٹ ڈویلپمنٹ کونسل (ڈی ڈی سی)، جو جموں و کشمیر کے دیہی علاقوں میں ترقیاتی منصوبہ بندی اور ان پر عملدرآمد کی ذمہ دار ہے، کے حالیہ انتخابات کے بعد پیپلز الائینس گوپکار ڈیکلریشن (پی اے جی ڈی) میں دراڑیں آنا شروع ہوگئی ہیں۔ پی اے جی ڈی قومی کانفرنس، پیپلز ڈیموکریٹک پارٹی، پیپلز کانفرنس، ہندوستان کی کمیونسٹ پارٹی، ہندوستان کی کمیونسٹ پارٹی (مارکسسٹ)، عوامی نیشنل کانفرنس، اور جموں کشمیر پیپلز موومنٹ جیسی مرکزی جماعتوں کا اتحاد ہے۔ یہ اتحاد موجودہ ریاست کی خصوصی حیثیت کی بحالی اور کشمیر میں مظلوم گروہوں کے حقوق کی حمایت کرتا ہے لیکن اقتدار کے اندرونی جھگڑوں کی وجہ سے کمزور ہوتا جارہا ہے۔

پی اے جی ڈی نے ڈی ڈی سی انتخابات میں ۲۴۰ میں سے ۱۱۰ نشستیں جیت کرانتخابات میں کامیابی حاصل کی۔ تاہم، یہ نتیجہ کشمیر میں نئے قائدین کے ظہور کے ساتھ سیاسی اقتدار کے لئے شدید جدوجہد کی نشاندہی کرتا ہے۔ مثلاً، ہندوستانی نیشنل کانگریس  ڈی ڈی سی انتخابات میں نیشنل کانفرنس اور پیپلز ڈیموکریٹک پارٹی کے ساتھ سیٹ شیئرنگ کا انتظام کرنے کے باوجود نومبر۲۰۲۰ میں پی اے جی ڈی سے کنارہ کش ہو گئی۔ مزید برآں، پیپلز کانفرنس نے اعتماد کی کمی کا حوالہ دیتے ہوئے، ۱۹ جنوری ۲۰۲۱ کو پارٹیوں کے اتحاد سے تعلق توڑ دیا۔ پی اے جی ڈی کی یہ کمزوری اس کے اصل ہدف کو مجروح کرتی ہے، جو جموں و کشمیر کی خصوصی حیثیت کو قانونی اور آئینی طریقوں کے ذریعے بحال کرنا تھا۔

بی جے پی اس دوران آزاد امیدواروں کو اپنی طرف لانے کی کوشش کر رہی ہے۔ بی جے پی یہ اس لئے کررہی ہے تا کہ اسمبلی اور پارلیمانی انتخابی حلقوں کا جائزہ مکمل ہونے اور انتخابات کے انعقاد کے بعد وہ بلدیاتی اداروں اور بالآخر یونین کے علاقہ اسمبلی پر اپنا کنٹرول حاصل کر پائے۔ مانا جاتا ہے کہ مارچ ۲۰۲۰ میں قائم کردہ  ڈلیمیٹیشن کمیشن جموں و کشمیر دونوں علاقوں کو مساوی تعداد میں نشستیں مختص کرے گی، جو بی جے پی کے مضبوط گڑھ جموں کا دیرینہ مطالبہ رہا ہے۔  اس کے علاوہ، بی جے پی کے متعدد رہنما یہ دباؤ ڈال رہے ہیں کہ جموں و کشمیر کا اگلا وزیر اعلی جموں ڈویژن کا ایک ہندو رہائشی ہونا چاہیئے۔ ڈی ڈی سی انتخابات کے دوران بی جے پی نے مقامی مسلم کمیونٹی کے خلاف نام نہاد اراضی گھوٹالہ میں جموں و کشمیر ہائی کورٹ کے فیصلے کا استعمال کیا تھا۔ بی جے پی کی پولرائزیشن کی سیاست کشمیر میں علیحدگی پسندوں کے عزائم کو ہوا دے رہی ہے اور صوبہ جموں میں اسلاموفوبیا کو بدتر  بنا رہی ہے۔

حاصل کلام

کووڈ ۱۹ ویکسی نیشن رول آؤٹ کے ساتھ ہندوستانی معیشت میں حیات نو کے آثار نمایاں ہونا شروع ہوگئے ہیں۔ اگرچہ قومی پروٹوکول کے مطابق کشمیر میں بھی ویکسینیں تقسیم کی جارہی ہیں، لیکن داخلی سیاسی عدم استحکام، سیکیورٹی کی صورتحال، اور پاکستان اور چین کے ساتھ جاری سرحدی تنازعہ ۲۰۲۱ میں معیشت کی بحالی میں رکاوٹ بن سکتا ہے۔ اس وقت جموں و کشمیر میں امن کا کوئی بھی دعویٰ بی جے پی حکومت کے ارادے، یعنی کہ ایک تاریخی غلطی درست کرنا، سے بالکل مختلف نظر آتا ہے۔

***

.Click here to read this article in English

Image 1: Ashok Boghani via Flickr

Image 2: Tasnim News Agency via Wikimedia

 

Share this:  

Related articles

پلوامہ – بالاکوٹ پانچ برس بعد جائزہ Hindi & Urdu

پلوامہ – بالاکوٹ پانچ برس بعد جائزہ

لمحۂ موجود میں پاکستان، بھارت کے تزویراتی بیانیے سے تقریباً…

جوابی کار روائی: کیا پاکستان فوجی حملوں کے رد عمل پر غور کر رہا ہے؟ Hindi & Urdu

جوابی کار روائی: کیا پاکستان فوجی حملوں کے رد عمل پر غور کر رہا ہے؟

ایران اور پاکستان کے درمیان حالیہ جیسے کو تیسا حملے …

پاکستان کا بعد از انتخابات ماحول: ماہرین کا ردعمل Hindi & Urdu

پاکستان کا بعد از انتخابات ماحول: ماہرین کا ردعمل

پاکستان تحریک انصاف (پی ٹی آئی) سے تعلق رکھنے والے…